இங்கிலாந்தில் நடைபெற்று வரும் உலக செம்பியன்ஷிப் லெஜண்ட்ஸ் கிரிக்கெட் தொடரில் இன்று (20) நடைபெறவிருந்த இந்தியா மற்றும் பாகிஸ்தான் அணிகளுக்கிடையிலான ஆட்டம் இரத்து செய்யப்பட்டுள்ளது.
இந்தியா, அவுஸ்திரேலியா, தென்னாப்பிரிக்கா, இங்கிலாந்து, மேற்கிந்திய தீவுகள் மற்றும் பாகிஸ்தான் ஆகிய அணிகள் பங்கேற்று விளையாடும் இந்த தொடரில், பாகிஸ்தானுடன் விளையாட இந்திய அணியின் முன்னாள் வீரர்கள் மறுப்பு தெரிவித்ததால், போட்டி ரத்தாகியுள்ளது.
இந்தியாவின் ஹர்பஜன் சிங், ஷிகர் தவான், இர்பான் பதான், யூசுப் பதான் உள்ளிட்ட முன்னாள் வீரர்கள் பாகிஸ்தானுடன் ஆட மறுத்துள்ளதாக இந்திய ஊடகங்கள் செய்தியிடுகின்றன.
இதனைத் தொடர்ந்து, “தேசத்திற்கு மேல் எதுவும் கிடையாது. மே 11 அன்று எடுத்த முடிவில் நிலைத்திருக்கிறேன்” என முன்னாள் இந்திய வீரர் ஷிகர் தவான் தனது X (முன்னாள் ட்விட்டர்) பக்கத்தில் பதிவிட்டுள்ளார்.
சுரேஷ் ரெய்னா உள்ளிட்ட ஏனைய வீரர்களும் இதே போன்ற கருத்தை வெளியிட்டுள்ளதுடன், இந்திய அணி முழுமையாக பாகிஸ்தானுக்கு எதிராக விளையாட மறுக்கும் நிலைப்பாட்டில் தொடர்ந்துள்ளமை குறிப்பிடத்தக்கது.
