நாட்டின் பிள்ளைகளின் எதிர்காலத்திற்காக சர்வதேச ரீதியில் மன்றாட வேண்டிய நிலை ஏற்பட்டுள்ளதாக ஜனாதிபதி ரணில் விக்கிரமசிங்க தெரிவித்துள்ளார்.
மிகவும் சிரமப்பட்டு கடத்தப்பட்ட அந்த யுகத்திற்கு மீண்டும் யாரும் செல்ல விரும்ப மாட்டார்கள் என்றும் அவர் தெரிவித்திருந்தார்.
கொள்ளுப்பிட்டி புனித அந்தோனியார் கல்லூரியில் நடைபெற்ற தேசிய பாடநூல் வழங்கும் நிகழ்வில் கலந்து கொண்டு உரையாற்றும் போதே ஜனாதிபதி மேற்கண்டவாறு தெரிவித்தார்.
“என் வீட்டைச் சுற்றி ஐந்து பாடசாலைகள் உள்ளன. நான் பயின்ற இரண்டு பாடசாலைகளான றோயல் கல்லூரி, தர்ஸ்டன் கல்லூரி மற்றும் மகளிர் கல்லூரி, மகாநாம கல்லூரி மற்றும் புனித அந்தோனியார் பெண்கள் கல்லூரி ஆகியவை வீட்டை சுற்றி அமைந்துள்ளன. அதனால் கல்வித்துறையில் அதிக கவனம் செலுத்த முடிந்துள்ளது. ஜே.ஆர் ஜயவர்தனவின் காலத்தில் இப்பாடசாலையின் அபிவிருத்தியில் கவனம் செலுத்தினோம்.
2022ல் நாட்டில் ஏற்பட்ட கடுமையான பொருளாதார நெருக்கடியால், கல்வித் துறை மட்டுமல்ல, அனைத்துத் துறைகளும் சரிவைச் சந்தித்தன. பாடசாலை பாடப்புத்தகங்கள், சீருடைகள் வழங்க முடியவில்லை. அந்த பொருளாதார நெருக்கடியில் இருந்து நாட்டை மீட்க எந்த தலைவரும் முன்வரவில்லை. அப்போது, சவாலை ஏற்று, நாட்டின் பொருளாதாரத்தை மீட்டெடுக்கும் திட்டத்தை துவக்கினேன்.
அந்த பொருளாதார வேலைத்திட்டத்தினால் இன்று நாடு ஓரளவு பொருளாதார ஸ்திரத்தன்மை பெற்று வருகின்றது. அதன்படி, பாடசாலை சீருடைகள் மற்றும் பாடசாலை பாடப்புத்தகங்களை உரிய நேரத்தில் வழங்க அரசால் முடிந்தது. அதற்காக 14 பில்லியன் ரூபாவுக்கும் அதிகமாக செலவிடப்பட்டது.
கல்வி சீர்திருத்தங்கள் மேற்கொள்ளப்பட்டு நாட்டில் புதிய கல்வி முறை உருவாக்கப்பட வேண்டும். உலகிற்கு ஏற்ற தொழில் வல்லுநர்களை உருவாக்குவதில் கவனம் செலுத்த வேண்டும். நாட்டை பொருளாதார மாற்றத்திற்கு இட்டுச் செல்லும் வகையில், உலகிற்கு ஏற்ற வகையில் கல்வி முறை உருவாக்கப்பட வேண்டும். உலகிற்கு ஏற்ற தொழில் வல்லுனர்களை உருவாக்க முடியும். சர்வதேச சந்தையுடன் போட்டி போடும் திறன் கொண்டது. பரீட்சை சுமையைக் குறைத்து, ஆங்கிலம் மற்றும் தொழில்நுட்பப் பாடங்களை கல்வி முறையில் சேர்த்து, வேலைக்குத் தகுந்த குழந்தையை உருவாக்குவோம் என நம்புகிறோம். அந்த நோக்கத்திற்காக தொழிற்கல்லூரிகள் மற்றும் தொழில்நுட்ப பல்கலைக்கழகங்களை நிறுவவும் எதிர்பார்க்கப்படுகிறது.
2022ல் இந்த நாட்டின் நிலைக்கு திரும்பவும் நாம் யாரும் செல்ல விரும்பவில்லை. எரிவாயு வரிசைகள், எரிபொருள் வரிசைகள் மற்றும் உணவு வரிசைகள் இல்லாத சமூகத்தை நாம் அனைவரும் எதிர்பார்க்கிறோம். அப்படிப்பட்ட இருண்ட யுகத்துக்குத் திரும்பாமல் வலுவான பொருளாதாரத்தை உருவாக்க பாடுபடுகிறோம். இலங்கையில் வலுவான பொருளாதாரத்தை உருவாக்கும் வேலைத்திட்டம் தற்போது நடைமுறைப்படுத்தப்பட்டு வருகின்றது…”
