நாட்டில் தொற்றக்கூடிய மற்றும் தொற்றாத நோய்களினால் சுகாதார அமைப்பு பாரிய சுமைக்கு உள்ளாகியுள்ள நிலையில், மேற்படி நோய்களுக்கான சிகிச்சை சேவைகளைப் போன்று நோய்களைத் தடுப்பதற்கும் கட்டுப்படுத்துவதற்கும் முன்னுரிமை வழங்கப்பட வேண்டுமென சுகாதார மற்றும் ஊடகத்துறை அமைச்சர் தெரிவித்தார்.
இலங்கை போஷாக்கு சங்கத்தின் 2025 ஆம் ஆண்டுக்கான வருடாந்த விஞ்ஞான ஆய்வு அமர்வில் கலந்து கொண்டு உரையாற்றும் போதே அமைச்சர் இதனைத் தெரிவித்தார்.
இலங்கை போஷாக்கு சங்கத்தின் (The Nutrition Society of Sri Lanka) 2025 ஆம் ஆண்டுக்கான வருடாந்த விஞ்ஞான ஆய்வு அமர்வு சுகாதார மற்றும் வெகுஜன ஊடக அமைச்சர் டொக்டர் நலிந்த ஜயதிஸ்ஸ தலைமையில் பண்டாரநாயக்க ஞாபகார்த்த சர்வதேச மாநாட்டு மண்டப வளாகத்தில் நடைபெற்றது.
2025ம் ஆண்டிற்கான வருடாந்த அறிவியல் ஆய்வு அமர்வு “மேம்பட்ட ஊட்டச்சத்து மற்றும் சுகாதாரஅறிவு மூலம் சமூகங்களை மேம்படுத்துதல்” என்ற கருப்பொருளின் கீழ் நடைபெற்றது.
அமர்வில் உரையாற்றிய அமைச்சர், ஊட்டச்சத்தை உயர்த்தி, சுகாதாரப் பாதுகாப்பை மேம்படுத்தி, அதிக உடல் செயல்பாடுகளில் ஈடுபடுவதற்கான வாய்ப்புகளை ஏற்படுத்தி, நோய்களில் இருந்து தற்காத்துக் கொள்வதற்கான அடிப்படை விழிப்புணர்வை மக்களுக்கு வழங்குவது மிகவும் அவசியம் என்றார்.
இது தனிநபர்களின் ஆரோக்கியத்தை அதிகரிக்கவும், இந்த நாட்டில் சுகாதார அமைப்பின் தேவையற்ற செலவைக் குறைக்கவும் உதவும் என்றும் சுட்டிக்காட்டப்பட்டது.
இந்த இலக்கை அடைவதற்கு, மருத்துவ வல்லுநர்கள், ஊட்டச்சத்து நிபுணர்கள், பத்திரிகையாளர்கள் உள்ளிட்ட அனைத்து சமூகப் பிரிவுகளின் பங்களிப்புடன் நோய்களைத் தடுக்க தேவையான நடவடிக்கைகளை எடுப்பது மிகவும் முக்கியம் என்றும், இலங்கை ஊட்டச்சத்து சங்கம் இதில் முன்னணியில் உள்ளது என்றும் அமைச்சர் மேலும் கூறினார்.
